બારડોલી,તા.૨૧
બારડોલી બાર એસોસીએશનની સામાન્ય ચૂંટણીમાં પ્રમુખ અને ઉપપ્રમુખ પદ માટે બબ્બે ઉમેદવારો મેદાનમાં હોય મતદાન કરવાની ફરજ પડી હતી. જેમાં પ્રમુખ તરીકે સુનિલ તળાવિયા ૧૨ મતોથી અને ઉપપ્રમુખ તરીકે અશોક રોહિતની ૧૩ મતોથી જીત થઈ હતી.
બારડોલી બાર એસોસિએશનના આગામી ૨૦૨૦ના હોદ્દેદારોની વરણી માટેની પ્રક્રિયા શરૂ કરવામાં આવતા પ્રમુખ પદ માટે બે ઉમેદવારોએ પોતાની દાવેદારી નોંધાવી હતી. જેમાં વર્તમાન પ્રમુખ અને કોંગ્રેસ શહેર પ્રમુખ નિકુંજ વકીલ અને સુનિલ તળાવીયા વચ્ચે પ્રમુખ પદ માટે સીધી ટક્કર થઈ હતી. કુલ ૧૦૮ મતદારોમાંથી ૯૨ મતદારોએ મતાધિકારનો ઉપયોગ કર્યો હતો. જેમાં નિકુંજભાઈને ૪૦ મત જ્યારે સુનિલભાઈને ૫૨ મત મળતા સુનિલ તળાવિયાનો ૧૨ મતે વિજય થયો હતો. જ્યારે ઉપપ્રમુખ પદ માટે અશોકભાઇ રોહિત અને રાજેન્દ્ર દુબે વચ્ચે ચૂંટણી થઈ હતી જેમાં અશોકભાઈને ૫૨ અને રાજેન્દ્રભાઈને ૩૯ મત મળ્યા હતા. અશોકભાઈનો ૧૩ મતોથી વિજય થતાં તેમને ઉપપ્રમુખ તરીકે ચૂંટાયેલા જાહેર કરવામાં આવ્યા હતા. બીજી તરફ સેક્રેટરી તરીકે કમલેશ પટેલ અને જોઇન્ટ સેક્રેટરી તરીકે મુકેશ કટારીયાની બિનહરીફ વરણી કરવામાં આવી હતી. સમગ્ર ચૂંટણી શાંતિપૂર્ણ માહોલમાં પૂર્ણ થઈ હતી.
"વંદે માતરમ ,ભારત માતાકી જય"
