રાજકોટ,તા.૧૭
રાજકોટ સહિત સમગ્ર સૌરાષ્ટ્ર – કચ્છમાં કાતિલ ઠંડીનું મોજું ફરી વળ્યું છે. હાડ ધ્રુજાવતી ઠંડીથી સૌરાષ્ટ્રના લોકો ધ્રુજી ઉઠયા છે. ભારે ઠંડીના કારણે લોકોની દિનચર્યાઓ ખોરવાઈ ગઈ છે. રાજકોટ શહેરમાં શુક્રવારે સિઝનનું નીચામાં નીચું ૭.૬ ડિગ્રી તાપમાન નોંધાયું છે. છેલ્લા ત્રણેક દિવસોથી ન્યુનતમ તાપમાનનો પારો સતત ૧૦ ડિગ્રીની નીચે જ ફરી રહ્યો છે. હજુ આવતા ત્રણેક દિવસ તો ઠંડીનો દોર જારી રહેશે તેમ હવામાન ખાતાના સૂત્રોએ જણાવ્યું છે.
રાજકોટમાં શુક્રવારે ૭.૬ ડિગ્રી લઘુતમ તાપમાન નોંધાયું છે. છેલ્લા કેટલાક દિવસોથી કાતિલ ઠંડીના પગલે શહેરીજનો ધ્રુજી ઉઠયા છે. લોકો ગરમ વસ્ત્રોમાં જ જોવા મળી રહ્યા છે. ઠંડીથી બચવા ગરમ પીણાનો સહારો લઈ રહ્યા છે. તાપણાની મોસમ પણ પૂર બહાર ખીલી છે. કામ સિવાય લોકો ઘરની બહાર નીકળવાનું ટાળી રહ્યા છે.
દરમિયાન હવામાન વિભાગના સૂત્રોએ કહ્યું છે કે ઉત્તર ભારતમાં થઈ રહેલ ભારે હિમવર્ષાના પગલે તેના પવનો સૌરાષ્ટ્ર – ગુજરાત ઉપર આવી રહ્યા હોય ઠંડીનું મોજુ ફરી વળ્યુ છે. વધુ એક વેસ્ટર્ન ડિસ્ટર્બન્સની અસરથી ઉત્તર ભારતના પહાડી વિસ્તારોમાં બરફવર્ષા થશે. જેથી આગામી દિવસોમાં પણ ઠંડીનો રાઉન્ડ ચાલુ રહે તેવી પૂરેપૂરી સંભાવના છે.
"વંદે માતરમ ,ભારત માતાકી જય"
