મહેસાણા,તા.૧૭
મહેસાણા શહેરમાં સ્ટ્રીટલાઈટનાં થાંભલા પર જાહેરાતનાં બોર્ડ લગાવવાનાં કૌભાંડમાં હવે પાલીકાની વિચિત્ર જાગવાઈ જાણવા મળી છે. પટેલ જ્વેલર્સનાં જાહેરાતનાં કૌભાંડમાં એજન્સીને ભાડું તેમજ પેનલ્ટીથી બચાવવા માટે પાલીકાએ જાહેરાતનાં બોર્ડનાં બદલે માત્ર થાંભલા ગણાવીને એક થાંભલા પર ગમે તેટલાં જાહેરાતનાં બોર્ડ લગાવી શકાય તેવો લૂલો બચાવ કર્યો છે. પાલીકાની આ વિચિત્ર જાગવાઈનાં કારણે એટલું કહી શકાય કે એક થાંભલા પર જોઈએ તેટલાં જાહેરાતનાં બોર્ડ લગાવીને એજન્સી કૌભાંડ કરી શકે છે.
મહેસાણા શહેરમાં સ્ટ્રીટલાઈટનાં થોડા થાંભલા પર જાહેરાતનાં બોર્ડ લગાવવાની મંજૂરી મેળવીને વધારે થાંભલાઓ પર જાહેરાતનાં બોર્ડ લગાવી દીધાનાં કૌભાંડનો નવગુજરાત સમયે પર્દાફાશ કર્યો હતો. આ અહેવાલ સંદર્ભે પાલીકા પ્રમુખે જાહેરાતનાં બોર્ડનો સર્વે કરાવીને જરૂર જણાયે એજન્સી પાસેથી પેનલ્ટી સાથે ભાડાની વસૂલાત કરવાનો આદેશ કર્યો હતો. પરંતુ જમીન ભાડા શાખાનાં કર્મચારીઓએ સર્વે કર્યા બાદ ૪૧૮ જાહેરાતનાં બોર્ડ ગણાવવાનાં બદલે ૧૬૮ થાંભલાઓ પર જાહેરાતનાં બોર્ડ લગાવ્યાનો પાલીકા પ્રમુખને રીપોર્ટ કર્યો છે.
તેથી પાલીકા પ્રમુખે જમીન ભાડા શાખાનાં કર્મીઓની માફક જાહેરાતનાં બોર્ડ નહી પરંતુ એજન્સીએ થાંભલો ભાડે લીધો હોવાનો રાગ આલાપીને માત્ર ૧૮ થાંભલાનું ભાડું તેમજ પેનલ્ટી લેવાનો નિર્ણય કર્યો હોવાનું કહીને પાણીમાં બેસી જતાં અનેક તર્ક-વિતર્ક થઈ રહ્યાં છે.
"વંદે માતરમ ,ભારત માતાકી જય"
