સુરત,તા.૨૩
સુરતના અઠવાલાઇન્સ પોલીસે દારુના કેસમાં યુવકની અટક કર્યા બાદ તેને માર નહીં મારવાના નામે પોલીસે મોટી રકમ પડાવી હતી. ત્યારબાદ પણ યુવાનને ઢોર માર મરાતા તેની બંને કિડની ફેઇલ થઇ ગઇ હતી. ચારેય પોલીસ કર્મીઓ સામે ફરિયાદ નોધવા માટે પોલીસ કમિશ્નર સુધી રજૂઆત કરી હોવા છતાં એફઆઇઆર નહીં નોંધાતા પરિવારે હાઇકોર્ટમાં અરજી કરી હતી.
મળતી માહિતી પ્રમાણે આઠ માસ અગાઉ અઠવાલાઇન્સ પોલીસ મથકના સર્વેલન્સ વિભાગના પીએસઆઇ ચાવડા સહિત પોલીસ કર્મીઓ સંજય ભરવાડ કિરપાલ સિંગ અને ધર્મેશ ગઢવીએ પ્રોહિબિશનના કેસમાં કપિલ જેઠાભાઇ પટેલ નામના યુવાનની ધરપકડ કરી હતી. ધરપકડ બાદ તેના પરિવારને બોલાવી કપિલને લોકઅપમાં નહીં મારવાના નામે રૂપિયા સાત લાખની માંગણી કરાઇ હતી.
બેબાકળા બનેલા પરિવારજનોએ એક લાખ રૂપિયા પોલીસ કર્મીઓને ચુકવી દીધા હતા. આમ છતાં બાકીની રકમ મેળવવા ચારેય પોલીસ કર્મીઓએ લોકઅપમાં કપિલ ઉપર શારીરિક જુલમ ગુજાર્યો હતો. પોલીસે ઢોર માર મારતા કપિલની બંને કિડનીઓ ફેઇલ થઇ ગઇ હતી. આઠ માસ અગાઉ અઠવા પોલીસ મથકના લોકઅપમાં ફિલ્મી સ્ટાઇલથી યુવાનની ધોલાઇને લઇને સમગ્ર પોલીસ બેડામાં ચકચાર મચી ગઇ હતી.
આ મામલે કપિલ પટેલના પરિવારજનોએ ચારેય પોલીસ કર્મીઓ સામે ફરિયાદ નોંધવવા પોલીસ કચેરી સુધી પગથિયા ઘસી નાંખ્યા હતા. આમ છતાં કોઇએ ફરિયાદ નહીં સાંભળતા છેવટે વકિલ મારફતે ગુજરાત હાઇકોર્ટમાં સ્પેશિયલ ક્રિમિનલ પિટિશન ફાઇલ કરી હતી.
"વંદે માતરમ ,ભારત માતાકી જય"
