અનેક વૃક્ષો ધરાશાયી, એનડીઆરએફની ૩ ટીમો સ્ટેન્ડ બાય રખાઈ, આજવા ડેમની સપાટીમાં સતત વધારો
સુરત-વલસાડ,તા.૧૨
દક્ષિણ ગુજરાતમાં વરસાદની મહેર હવે કહેર બનતી જઈ રહી છે. દક્ષિણ ગુજરાતના વલસાડ સહિતના જિલ્લાઓમાં છેલ્લા પાંચ દિવસથી મેઘરાજાએ હેત વરસાવવાનું ચાલુ રાખ્યું છે. અવિરત પડી રહેલા વરસાદને કારણે દક્ષિણ ગુજરાતની નદીઓમાં ઘોડાપૂર આવ્યા છે. દક્ષિણ ગુજરાતમાં સુરત, વલસાડ, નવસારી તો મધ્ય ગુજરાતના છોટાઉદેપુર અને વડોદરાની નદીઓ બે કાંઠે વહેતી થઈ છે.
સુરતમાં બુધવારે રાતથી શરૂ થયેલો વરસાદ ગુરુવારે પણ ચાલુ રહ્યો હતો. વરસાદને કારણે શહેરના અનેક વિસ્તારોમાં પાણી ભરાઈ ગયા હતા. વરસાદને કારણે સચિન જીઆઈડીસી પોલીસ સ્ટેશનમાં પણ પાણી ભરાઈ ગયું હતું. જેમાં જપ્ત કરવામાં આવેલા વાહનો વરસાદી પાણીમાં ડૂબી ગયા હતા. રેસ્ક્યૂ માટે ફાયર બ્રિગેડની ટીમ બોલાવવી પડી હતી. વરસાદને કારણે સુરતમાં અનેક વૃક્ષો પણ ધરાશાયી થઈ ગયા હતા. તો અમુક જગ્યાએ દીવાલો ધરાશાયી થયાના સમાચાર મળી રહ્યા છે.
ઉપરવાસમાં વરસાદને કારણે મહુવા ખાતેથી પસાર થતી અંબિકા નદીમાં પૂર આવ્યું છે. જેના કારણે નદી પર આવેલો મધર ઇન્ડીયા ડેમ ઓવરફ્લો થઈ ગયો છે. મધ્ય પ્રદેશમાં સારો વરસાદ પડવાને કારણે છોટાઉદેપુરની ઓરસંગ નદીમાં ધોડાપૂર આવ્યું છે. વલસાડના ઉપરવાસમાં પડેલા ભારે વરસાદને કારણે ઔરંગા નદીમાં નવા નીર આવ્યા છે. હાલમાં નદી ભયજનક સપાટીએ વહી રહી છે.
વલસાડના ધરમપુર પાસેના ઓજરપાડામાં એલર્ટ જાહેર કરાયું છે. ધરમપુરમાં ભારે વરસાદના કારણે નદીમાં આવ્યા નીરની આવક વધારે ભયજનક બની છે. અહીં સ્વર્ગવાહીની નદી બે કાંઠે વહી રહી છે. નદીના પાણી ઓજરપાડાના રોડના લો લેવલ બ્રિજ પર ફરી વળ્યા છે. જેના કારણે સ્થાનિકો જીવના જાખમે બ્રિજ પસાર કરવા મજબુર બન્યા છે.
તાપી જિલ્લામાં છેલ્લા બે દિવસથી પડી રહેલા વરસાદને પગલે જિલ્લાના મોટાભાગના વિસ્તારોમાં જળ બંબાકારની પરિસ્થિતિ સર્જાઈ છે. આ વચ્ચે જિલ્લામાંથી પસાર થતી ઝાખરી નદી પર માલોઠા ગામની સિમમાં નેશનલ હાઇવે પરનો પુલનો એપ્રોચનો એક ભાગ ધરાશાયી થઈ ગયો હતો. આ પુલ પર વાહનવ્યવહાર બંધ કરાવવામાં આવ્યો હતો.
હવામાન વિભાગે હજી પાંચ દિવસ સુધી રાજ્યમાં ભારે વરસાદ પડવાની આગાહી વ્યક્ત કરી છે. હવામાન વિભાગના જણાવ્યા પ્રમાણે આગામી પાંચ દિવસમાં દક્ષિણ ગુજરાતી સ્થિતિ હજુ વધારે ખરાબ થઈ શકે છે. હવામાન વિભાગના જણાવ્યા પ્રમાણે આગામી દિવસોમાં નવસારી, વલસાડ, સુરત, તાપી, ડાંગ, દમણ, દાહોદ, પંચમહાલ, નર્મદા, ખેડા, મહીસાગર, છોટા-ઉદેપુર તેમજ સૌરાષ્ટ્રના અમરેલી, ગીર-સોમનાથ, ભાવનગર, દીવ, જૂનાગઢમાં વરસાદ ભારે વરસાદ પડી શકે છે. આગામી ૧૪ અને ૧૫ જુલાઈના રોજ અમદાવાદમાં સારો વરસાદ પડી શકે છે.
તો આ તરફ દીવમાં મેધરાજાનું આગમન થયું છે. વહેલી સવારથી ધોધમાર વરસાદ આવતા પ્રવાસીઓમાં ખુશીની લહેર જાવા મળી છે. દરિયાકિનારે પ્રવાસીઓ વરસાદની મજા માણતા નજરે ચઢ્યા છે. વરસાદને પગલે અનેક વિસ્તારોમાં પાણી ભરાયા છે.
(જી.એન.એસ)
જંગ એ ગુજરાત ના વેબ ન્યૂઝ પોર્ટલ માટે
માનદ પ્રતિનિધિ નિમવાના છે તો સંપર્ક કરો
Mo. 9978406923
PRESS card આપવામાં આવશે
"વંદે માતરમ ,ભારત માતાકી જય"
