ન્યુ દિલ્હી,
તા.૪/૫/૨૦૧૮
દેશમાં આ સમયે ધુમ્મસ કે પૂર નથી તો પણ ટ્રેનો વિલંબથી ચાલી રહી છે અને તેના કારણે દેશભરમાં મુસાફરો પરેશાન છે. સામાન્યપણે ટ્રેનોની વિલંબની વાત કરવામાં આવે છે તો રેલ મંત્રાલય ધુમ્મસ અથવા પૂરનું કારણ આપી દેતું હોય છે. હાલમાં તો દેશમાં ક્યાંય કોઇ આંદોલનો પણ નથી કે તેના કારણે રેલ સેવાને અસર થતી હોય. આવું હોવા છતાં પણ ટ્રેનો કલાકો સુધીના વિલંબથી ચાલી રહી છે. તેમના પહોંચવાના સ્થળનો કોઇ સમય પણ નિર્ધારિત નથી. રેલ મંત્રાલયના આંકડાઓ પણ આ જ કહે છે કે રેલવેનું સમયપત્રક બગડી ગયું છે. ટ્રેનો ભલે વિલંબથી ચાલી રહી હોય, પરંતુ રેલવેનું કહેવું છે કે ‘દુર્ઘટના સે દેર ભલી.’
૨૦૧૬-૧૭માં રેલવે મેલ-એક્સપ્રેસનો સમયે પહોંચવાની સરેરાશ ૭૬ ટકા રહી હતી. મતલબ કે ૭૬ ટકા ટ્રેન ટાઇમ પર ચાલી રહી હતી. નાણાકીય વર્ષ ૨૦૧૭-૧૮માં મેલ-એક્સપ્રેસનો સમયે પહોંચવાની સરેરાશ સમય મર્યાદા ઘટીને ૭૧.૩૮ ટકા થઇ છે. મતલબ સ્થિતિ સુધરવાને બદલે બગડી ગઇ છે.
રેલ મંત્રાલયના ડિરેક્ટર (માહિતી અને પ્રકાશન) વેદપ્રકાશનું કહેવું છે કે મોદી સરકાર માળખું વિકસિત કરવા પર ધ્યાન આપી રહી છે. ૨૦૦૯-૧૪ દરમિયાન દર વર્ષે રેલ માળખમાં ૨૪,૩૦૭ કરોડનું રોકાણ કરાયું હતું. મોદી સરકાર આવ્યા બાદ ૨૦૧૪-૧૫માં ૫૮,૭૧૮ કરોડનું રોકાણ કરાયું હતું. એ પછીના બે વર્ષોમાં અનુક્રમે ૯૩,૫૨૦ કરોડ અને ૧,૦૯,૯૩૫ કરોડનું રોકાણ થયું હતું. તેમનું કહેવું છે કે દેશભરમાં રેલવેના વીજળીકરણ, ટ્રેક વધારવા અને આધુનિકરણની દિશામાં ઝડપી કામ ચાલી રહ્યું છે.
"વંદે માતરમ ,ભારત માતાકી જય"
