અમદાવાદ,
રૂપિયા ડબલ કરી આપવાની લોભામણી સ્કીમ દ્વારા નાગરિકો સાથે છેતરપિંડી આચરાયાનો ચોંકાવનારો મામલો હાઇકોર્ટ સમક્ષ આવ્યો છે. જેમાં રાજમોરાલ ઇન્વેસ્ટમેન્ટ એન્ડ ફાઈનાન્સના કથિત આરોપી રમેશચંદ્ર મોરાલે રેગ્યુલર જામીન મેળવવા હાઇકોર્ટમાં અરજી કરી છે. તેની વિરૂદ્ધ શાહીબાગ પોલીસ સ્ટેશનમાં ફરિયાદ નોંધાવવામાં આવી છે. જ્યારે કે પીડિતોનો એવો દાવો છે કે આરોપીએ ફાઈનાન્સ કંપની બનાવીને પાંચ વર્ષમાં નાણાં ડબલ કરી આપવાની લાલચ આપી ગુનાહિત કાવતરું રચ્યું હતું.
કુલ ૧૮૮ લોકો પાસેથી અંદાજિત રૂ. ૬.૩૯ કરોડ જેટલી માતબર રકમ-થાપણો ઉઘરાવી આરોપીએ પરત ચુકવણી નહીં કરીને વિશ્વાસઘાત અને છેતરપિંડીનો ગુનો આચર્યો છે. અરજદાર આરોપીની જામીન અરજીમાં હાઇકોર્ટે રાજ્ય સરકારને અગાઉ નોટિસ પાઠવી હતી. હવે આ કેસની વધુ સુનાવણી ૧૫મી જૂનના રોજ થશે.
સામાન્ય નાગરિકોના કરોડો રૂપિયાનું ફુલેકું કરવાના આ પ્રકરણમાં શાહીબાગ પોલીસ સ્ટેશનમાં ફરિયાદ નોંધાઇ છે. ફરિયાદમાં અરજદાર રમેશચંદ્ર તેની કંપનીમાં લોકોએ ડિપોઝીટ તરીકે મૂકેલી રકમ લઇને ફરાર થઇ ગયો હોવાનો આક્ષેપ કરવામાં આવ્યો હતો. ફરિયાદમાં રશ્મિકાબેન નામની પીડિતાએ એવી હકીકત દર્શાવી હતી કે,‘અરજદાર દ્વારા સિવિલ હોસ્પિટલની પાછળ ન્યૂ નાકોડા એપાર્ટમેન્ટમાં વિવાદીત કંપની ઊભી કરવામાં આવી હતી.
આ સમગ્ર પ્રકરણમાં આરોપી દ્વારા નીચલી અદાલતમાંથી રાહત નહીં મળતા તે હાઇકોર્ટ સમક્ષ પહોંચ્યો છે. જેમાં કેસની સુનાવણી દરમિયાન અનેક પીડિત મહિલાઓ હાઇકોર્ટમાં ઉપસ્થિત રહી હતી. નીચલી અદાલતમાં પણ મહિલાઓ અને અન્ય પીડિતો દ્વારા આરોપીની જામીન અરજી સામે વાંધા અરજી કરવામાં આવી હતી. હવે આ કેસમાં વધુ સુનાવણી ૧૫મી જૂને હાથ ધરાશે.
"વંદે માતરમ ,ભારત માતાકી જય"
