ન્યુ દિલ્હી,તા.૨૨
નોટબંધી બાદ કેન્દ્ર સરકારે શેલ કંપનીઓ બંધ કરાવવાનું અભિયાન હાથ ધર્યું તે રીતે હવે ફાઈનાન્સ કંપનીઓ વિરૃધ્ધ કાર્યવાહી શરૃ કરાઈ છે. કેટલીક નામાંકિત કંપનીઓએ પોતાની ફાઈનાન્સ કંપનીઓ શરૃ કરી છે. પરંતુ આ પૈકીની કેટલીક ફાઈનાન્સ કંપનીઓએ રિઝર્વબેંકના નિયમોનું ઉલ્લંઘન કર્યું છે. કેટલીક કંપનીઓએ સામે ચાલીને પોતાના લાયસન્સ જમા કરાવી દીધા હતા. વર્ષે ૨૦૧૬ થી જૂન ૨૦૧૮ સુધીમાં દેશની ૩૦૪ ફાઈનાન્સ કંપનીઓ સામે રિઝર્વબેંકે કાર્યવાહી કરી છે. જેમાં ગુજરાતની ૧૫ કંપનીઓનો સમાવેશ થાય છે.
કેન્દ્ર સરકારે નોટબંધીની જાહેરાત કરી તે અગાઉ દેશમાં અનેક શેલ કંપનીઓ કાર્યરત હતી જેમાં નાણાંકિય ગોટાળા થતા હોવાનું બહાર આવ્યું હતુ. માત્ર કાગળ પર જ આવી કંપનીઓ ચાલતી હતી.આથી રિઝર્વબેંક નાણાં વિભાગ, રજિસ્ટ્રાર ઓફ કંપની વિગેરેએ સંયુક્ત રીતે કામગીરી કરી ગેરરીતિ આચરતી આવી અનેક બોગસ શેલ કંપનીઓ બંધ કરાવવાની કાર્યવાહી ચાલી રહી છે.
દરમ્યાનમાં રિઝર્વ બેંકના ધ્યાન ઉપર બીજી મહત્વની બાબત એવી આવી કે, કેટલીક ફાઇનાન્સ કંપનીઓ પણ એક કંપનીમાંથી બીજી કંપનીમાં નાણાંકીય હેરાફેરી માટે જ બનાવવામાં આવી છે. એટલું જ નહીં રિઝર્વ બેંકે નક્કી કરેલા નિયમોનો તેમાં ભંગ કરવામાં આવી રહ્યો છે.રિઝર્વ બેંકે વર્ષ ૨૦૧૬-ઓક્ટોબરથી વર્ષ- ૨૦૧૮-જૂન સુધીમાં દેશભરની ૩૦૪ જેટલી ફાઇનાન્સ કંપનીઓના લાયસન્સ રદ કર્યા અથવા કેટલાક કંપનીઓએ સામે ચાલી રિઝર્વ બેંકમાં લાયસન્સ સરન્ડર કર્યા હોવાનું જાણવા મળે છે.
ગુજરાતમાં આ સમયગાળા દરમ્યાન ૧૫ ફાઇનાન્સ કંપનીના લાયસન્સ રદ થયા છે. અથવા કેટલીક કંપનીએ ફાઇનાન્સનું કામકાજ બંધ કરી પોતાના લાયસન્સ સરન્ડર કર્યા છે.
(જી.એન.એસ)
"વંદે માતરમ ,ભારત માતાકી જય"
