ચંદીગઢ,તા.૨૫
ભાજપે મંગળવારે સાંજે પંજાબની ગુરુદાસપુર લોકસભા બેઠક પરથી બોલીવુડ અભિનેતા સન્ની દેઓલને ઉમેદવાર બનાવવાની જાહેરાત કરી હતી. ત્યારબાદ ગુરુદાસપુરથી ચાર વખત સાંસદ તરીકે ચૂંટાયેલાં દિવંગત અભિનેતા વિનોદ ખન્નાની પત્ની અને ભાજપની ટિકિટની રાહ જાતાં કવિતા ખન્નાએ કહ્યું હતું કે ‘અભિનેતા સન્ની દેઓલને ગુરુદાસપુર બેઠકથી ટિકિટ મળવાથી ‘છેતરપિંડી’ થઈ હોવાનો અનુભવ કરી રહી છું અને હવે અપક્ષ ચૂંટણી લડવા સહિતના અન્ય વિકલ્પો પર પણ વિચારણા કરી રહી છું. ભાજપે સન્ની દેઓલને ટિકિટ આપતાં કવિતા ખન્નાની આશા પર પાણી ફરી વળ્યું છે કેમ કે કવિતા ખન્ના આ બેઠક પરથીટિકિટ મેળવવા ઈચ્છતી હતી.
કવિતા ખન્નાએ કહ્યું કે, હું છેતરાઈ હોવાનો અનુભવ કરી રહી છું. હું એ પણ અનુભવી રહી છું કે જે લોકો મને સાંસદ તરીકે જાવા ઈચ્છતા હતાં, તેમની આશાને અવગણવામાં આવી છે. હું અપક્ષ ચૂંટણી લડવા સહિતના વિકલ્પો અંગે વિચાર કરી રહી છું. પરંતુ હજુ કોઈ નિર્ણય લીધો નથી.
કવિતા ખન્નાએ કહ્યું કે, દિવંગત વિનોદ ખન્નાની સાથે રહીને ગુરુદાસપુરના લોકોની ૨૦ વર્ષ સેવા કરી છે. કવિતાએ ખન્નાએ ટિકિટ મળવાની આશામાં ગુરુદાસપુરના લોકો અને પાર્ટી કાર્યકર્તાઓ સાથે બેઠક પણ કરી હતી.
વિનોદ ખન્નાએ ૧૯૯૮, ૧૯૯૯, ૨૦૦૪ અને ૨૦૧૪માં ગુરુદાસપુર સીટથી જીત મેળવી હતી. જોકે, એમના અવસાન બાદ ૨૦૧૭ની પેટાચૂંટણીમાં કોંગ્રેસના ઉમેદવાર સુનીલ જાખડે જીત મેળવી હતી.
"વંદે માતરમ ,ભારત માતાકી જય"
