રાંચી,તા.૨
કોંગ્રેસ અધ્યક્ષ રાહુલ ગાંધીએ શનિવારે વડાપ્રધાન નરેન્દ્ર મોદી પર રાફેલ ડીલ મામલે ફરીથી પ્રહારો કર્યા છે. ઝારખંડમાં કોંગ્રેસની પરિવર્તન ઉલ્ગલન મહા રેલીમાં રાહુલે મોદી પર વાર કરતા કહ્યુ કે, પીએમે ભ્રષ્ટાચાર મુક્ત સરકાર, રોજગારી સર્જન અને ખેડૂતોની વેદના ઓછી કરવાનું આપવાનું વચન આપીને લોકોને ગેરમાર્ગે દોર્યા છે. પીએમ મોદીની છબિ ‘અચ્છે દિન’માંથી ‘ચોકીદાર ચોર હે’ની બનીને રહી ગઈ છે.
કોંગ્રેસ અધ્યક્ષ રાહુલ ગાંધીએ વધુમાં જણાવ્યું કે, ‘એક ચોકીદારને પગલે બીજા તમામ ચોકીદારોની બદનામી થઈ છે. વાસ્તવમાં ચોકીદાર એ જવાબદાર વ્યકિત હોય છે અને પ્રામાણિક હોય છેપહવે દેશના દરેક લોકો જાણે છે કે ચોકીદાર ચોર હેનો અર્થ નરેન્દ્ર મોદીના સંદર્ભમાં છે.’
રાહુલે રાફેલ ડીલનો ઉલ્લેખ કરતા જણાવ્યું કે, ‘પીએમ મોદીએ લોકોના ખીસ્સામાંથી રૂ. ૩૦,૦૦૦ કરોડ સેરવી લીધા અને હિન્દુસ્તાન એરોનોટિક્સ લિમિટેડને કોન્ટ્રાક્ટ આપવાને બદલે ઉદ્યોગપતિ અનિલ અંબાણીને રાફેલ કોન્ટ્રાક્ટ આપ્યો હતો.’
કોંગ્રેસ દ્વારા એનડીએ સરકારની રાફેલ ડીલને લઈને સતત હુમલા કરવામાં આવી રહ્યા છે. સરકારના રક્ષા મંત્રીએ રાફેલ મામલે અનેક સ્પષ્ટતાઓ કરી હતી તેમ છતા કોંગ્રેસે આ મામલે પીએમ મોદી પર નિશાન સાધવાનું ચાલુ રાખ્યું છે.
૨૦૧૪ બાદ ઝારખંડમાં સૌપ્રથમ રેલીને સંબોધી રહેલા કોંગ્રેસ અધ્યક્ષે જણાવ્યું કે, વાયુસેના દેશની સુરક્ષા કરે છે અને એરફોર્સના પાયલટ બલિદાન આપી રહ્યા છે ત્યારે વડાપ્રધાન નાણાં ચોરીને અનિલ અંબાણીના ખીસ્સામાં નાંખ્યા છે.
રાહુલે ઉમેર્યું હતું કે દેશ આગામી લોકસભામાં ‘ચોકીદાર’ને હરાવશે. તેમણે વચન આપ્યું કે કોંગ્રેસ સત્તામાં આવશે તો તેઓ ગરીબો માટે લઘુત્તમ નિશ્ચિત આવતની યોજના અમલમાં લાવશે.
"વંદે માતરમ ,ભારત માતાકી જય"
