નવી દિલ્હી,
એક રાજ્યમાંથી બીજા રાજ્યમાં વાહનો ટ્રાંસફર કરવા પર અને નવો રજિસ્ટ્રેશન નંબર મેળવવા માટે કોઈ રોડ ટેક્સ નહીં ચૂકવવો પડે પરંતુ આમ ત્યારે જ થશે જ્યારે દેશના બધા રાજ્યોની સરકાર રાજ્યોના વાહનવ્યવહાર મંત્રીઓના ગ્રુપ (GoM)નો પ્રસ્તાવ સ્વીકારે. આ સિવાય જે વાહનો બે વર્ષથી વધારે જૂના હોય અને બે રાજ્યોના ટેક્સ રેટમાં ૨ ટકાથી ઓછો તફાવત હોય તેવા વાહનો પર જ આ નિયમ લાગુ થશે. ગુવાહાટીમાં આ અઠવાડિયે ૧૨ રાજ્યોના વાહનવ્યવહાર મંત્રીઓની બેઠક યોજાઈ હતી. જેમાં નિર્ણય લેવાયો કે વાહનોના ટ્રાંસફર અને એક રાજ્યમાંથી બીજા રાજ્યમાં ડ્રાઈવિંગ લાઈસંસની પ્રક્રિયા ઓનલાઈન કરવાથી સરળતાથી કામ થઈ શકે. નો ઓબ્જેક્શન સર્ટિફિકેટ (NOC) પણ સાથે જ આપી દેવું જોઈએ. આ પ્રક્રિયાઓથી ભ્રષ્ટાચાર નહીં થાય અને નાગરિકોને પણ હાલાકી નહીં ભોગવવી પડે. કેંદ્ર સરકારે GoM ને વાહનવ્યવહાર વિભાગની મુશ્કેલીઓ અંગે માહિતી આપીને તેમાં સુધારો કરવા સૂચના આપી છે. સડક પરિવહન અને ટ્રાંસપોર્ટ મંત્રાલય ટૂંક સમયમાં જ નવા નિયમો સાથેની એક માર્ગદર્શિકા બહાર પાડશે તેવું સૂત્રો પાસેથી જાણવા મળ્યું છે. હાલમાં ટ્રાંસફર કરેલા વાહનોનું રજિસ્ટ્રેશન અને ડ્રાઈવિંગ લાઈસંસ માટે અરજી કરનારે જે રાજ્યમાંથી આવ્યા હોય ત્યાંના RTOમાંથી NOC લાવીને જે રાજ્યમાં શિફ્ટ થયા હોય ત્યાંના RTOમાં આપવું પડે છે. દિલ્હીના એક ટ્રાંસપોર્ટ અધિકારીએ કહ્યું કે, અમારા જેવા ટ્રાંસપોર્ટ અધિકારીઓ લોકોને આ પ્રકારની મુશ્કેલીમાંથી પસાર થવા માટે મજબૂર કરીએ છે તે ખૂબ ખરાબ બાબત છે. વાહન માલિકને ૧૦ વર્ષનો ટેક્સ ચૂકવવા ફરજ પાડીએ છીએ જે તે અગાઉથી અન્ય રાજ્યમાં ચૂકવીને આવ્યો છે. અને આ આચરણ દરેક રાજ્યમાં છે. ધ નેશનલ ઈન્ફોર્મેટિક્સ સેંટર દ્વારા સેંટ્રલ ઓનલાઈન ડેટાબેઝ તૈયાર કરાયો છે. વાહનોના રજિસ્ટ્રેશન માટે ‘વાહન-૪’ અને લાયસંસ આપનાર અધિકારીઓ નવો રજિસ્ટ્રેશન નંબર આપતાં પહેલા જૂનો રજિસ્ટ્રેશન નંબર ડિલીટ કરી શકે તે માટે ‘સારથી-૪’ તૈયાર કરાયું છે.
"વંદે માતરમ ,ભારત માતાકી જય"
