ઉમેદવારોએ ફોજદારી કેસો, મિલકત, દેવું, જવાબદારી તથા
શૈક્ષણિક લાયકાતની વિગતો સાથે સોગંદનામું રજૂ કરવાનું રહેશે
ભારતીય ચૂંટણી પંચ દ્વારા નામદાર સર્વોચ્ચ અદાલતના ચૂકાદાને અનુલક્ષીને લોકસભા અને વિધાનસભાની ચૂંટણીઓ દરમિયાન ઉમેદવારોએ ઉમેદવારી પત્રની સાથે રજૂ કરવાના સોગંદનામાના નમૂના (ફોર્મ નં-૨૬)માં સુધારા-ફેરફાર કરવામાં આવ્યા છે. જેમાં ઉમેદવારોએ તેઓની સામેના ફોજદારી કેસો, મિલકત દેવું, જવાબદારી તથા શૈક્ષણિક લાયકાતની માહિતી દર્શાવતું સોગંદનામું હવે પછીની લોકસભા અને વિધાનસભાની તમામ ચૂંટણીઓમાં સુધારેલા નમૂના પ્રમાણે જ ફોર્મ નં.-૨૬માં રજૂ કરવાનું રહેશે તેમ, રાજ્યના મુખ્ય નિર્વાચન અધિકારી ડૉ. એસ.મુરલીક્રિષ્ણાની અખબારી યાદીમાં જણાવાયું છે.
સર્વોચ્ચ અદાલતના ચૂકાદાને ધ્યાને રાખીને ભારતના ચૂંટણી પંચ દ્વારા વધુમાં જણાવવામાં આવે છે કે, જે ઉમેદવારો સામે ફોજદારી કેસો પડતર હોય કે ભૂતકાળમાં કોઇ કેસ સંદર્ભે સજા થઇ હોય તેવા ઉમેદવારોએ આ કેસોની વિગતો બહોળી પ્રસિદ્ધિ સારૂ જે-તે મતક્ષેત્ર વિસ્તારના બહોળો ફેલાવો ધરાવતા સમાચાર પત્રમાં પ્રસિદ્ધ કરવી પડશે. નામાંકન પાછું ખેંચવાની છેલ્લી તારીખથી માંડી ચૂંટણીના બે દિવસ પૂર્વેના સમયગાળામાં ઓછામાં ઓછી ત્રણ અલગ-અલગ તારીખોએ આવી પ્રસિદ્ધિ કરવી પડશે. જે ઉમેદવારો સામે ફોજદારી કેસો હોય તેઓએ ટીવી ચેનલો ઉપર પણ નિયત સમયગાળા દરમિયાન ત્રણ અલગ-અલગ દિવસોએ તે અંગેની પ્રસિદ્ધિ કરવાની રહેશે. આવા ઉમેદવારોએ જે સમાચાર પત્રોમાં આ અંગેની પ્રસિદ્ધિ કરી હોય તેની નકલો જિલ્લા ચૂંટણી અધિકારીને ચૂંટણી ખર્ચના હિસાબોની સાથે રજૂ કરવાની રહેશે.
આ ઉપરાંત રાજકીય પક્ષો દ્વારા ઉભા રાખવામાં આવેલ ઉમેદવારોએ તેમની સામેના ફોજદારી કેસોની જાણ રાજકીય પક્ષને કરી હોવાની ચૂંટણી અધિકારી સમક્ષ જાહેરાત કરવાની રહેશે. જે રાજકીય પક્ષો (માન્ય પક્ષો અને નોંધાયેલ બિનમાન્યતા પ્રાપ્ત રાજકીય પક્ષો)એ જેની સામે ફોજદારી કેસો પડતર હોય કે ભૂતકાળમાં તેવા કેસોમાં સજા થઇ હોય તેવા ઉમેદવારોને ઉભા રાખ્યા હોય તે પક્ષોએ પણ તે અંગેની જાહેરાત પોતાની વેબસાઇટ ઉપર તેમજ ટીવી ચેનલો અને રાજ્યમાં બહોળો ફેલાવો ધરાવતા પ્રચલિત સમાચારપત્રોમાં કરવાની રહેશે. અલબત, ટી.વી. ચેનલોમાં પ્રસારણ કરતી વખતે આવી જાહેરાત રાજકિય પ્રચાર-પ્રસાર માટેના પ્રતિબંધિત સમયગાળા એટલે કે મતદાન સમાપ્તિના છેલ્લા કલાક પૂર્વેના ૪૮ કલાક દરમિયાન ન કરવામાં આવે તેની તકેદારી પણ રાખવાની રહેશે.
સુધારેલ નમૂનાની નકલ ભારતના ચૂંટણી આયોગની વેબસાઇટ ઉપર તેમજ જિલ્લા ચૂંટણી અધિકારી તથા ચૂંટણી અધિકારીની કચેરીમાં પણ ઉપલબ્ધ થશે, જેની નોંધ લેવા દરેક રાજકીય પક્ષો અને જાહેર જનતાને મુખ્ય નિર્વાચન અધિકારીશ્રીની યાદીમાં અનુરોધ કરવામાં આવ્યો છે.
જંગ એ ગુજરાત ના વેબ ન્યૂઝ પોર્ટલ માટે
માનદ પ્રતિનિધિ નિમવાના છે તો સંપર્ક કરો
Mo. 9978406923
PRESS card આપવામાં આવશે.
આવતી કાલના સમાચાર પત્રો ના સંભવિત સમાચાર આજેજ નિહાળો.(રોજ રાત સુધી માં 100 થી વધુ સમાચાર માટે જોતા રહો)
www.jungegujarat.in
*જાહેરાત માટે સંપર્ક કરો
7574888861
"વંદે માતરમ ,ભારત માતાકી જય"
