આ પુલ ચીનની સીમા પાસે આવેલા અ.પ્રદેશના અપર સિયાંગ નદી પર બનાવવામાં આવ્યો
ઇટાનગર,તા.૧૦
મુખ્યમંત્રી પેમા ખાંડૂએ બુધવારના રોજ ભારતના સૌથી લાંબા ૩૦૦ મીટર સિંગલ-લેન સ્ટીલ કેબલ સસપેન્શન પુલનું ઉદ્ઘાટન કર્યું. આ પુલ ચીનની સીમા પાસે આવેલા અરુણાચલ પ્રદેશના અપર સિયાંગ જિલ્લામાં સિયાંગ નદી પર બનાવવામાં આવ્યો છે. આ પુલનું ઉદ્ધાટન થવાથી યિંગકિયોંગી તુતિંગ શહેર સુધીનું અંતર ૪૦ કિલોમીટર ઓછું થઈ જશે. પહેલા બનાવવામાં આવેલ રોડની લંબાઈ ૧૯૨ કિલોમીટરની હતી.
સસ્પેન્શન પુલને બ્યોરુંગ બ્રિજના નામથી પણ ઓળખવામાં આવશે. આ પુલને બનાવવામાં ૪,૮૪૩ કરોડ રૂપિયાનો ખર્ચ થયો છે. ખાંડૂનું કહેવું છે કે, આ નવા બનાવેલા બ્રિજથી સિયાંગ નદીની બંને બાજુએ રહેતા લગભગ ૨૦,૦૦૦ લોકોને ફાયદો થશે તેમજ દેશની રક્ષા તૈયારીઓમાં પણ વધારો થશે.
મુખ્યમંત્રીએ કહ્યું કે, સારી કનેક્ટિવિટી રાજ્યને સમૃદ્ધિની દિશામાં લઈ જાય છે તેમજ કેન્દ્ર સરકારે વડાપ્રધાન ગ્રામ સડક યોજના (પીએમજીએસવાય) અંતર્ગત કુલ ૨૬૮ રસ્તાઓની પરિયોજનાઓ માટે ૩૮૦૦ કરોડ રૂપિયાનું ભંડોળ એકઠું કર્યું છે. તેમણે કહ્યું કે, અપર સિયાંગ જિલ્લામાં બે પીએમજીએસવાય યોજનાઓને મંજૂરી આપી દેવામાં આવી છે. તેમણે કહ્યું કે આ યોજનાઓમાં પાલિંગથી જિડો સુધી ૩૫ કિલોમીટર લાંબા રસ્તાનું નિર્માણ પણ કરવામાં આવશે.
"વંદે માતરમ ,ભારત માતાકી જય"
