કુલગામમાં બે ઘરમાં છુપાયેલા આતંકીઓએ સેના પર ફાયરિંગ કર્યું હતું
છ કલાક વિત્યા બાદ સેનાએ ઘરોને ઉડાવી દીધા,આતંકીઓ પાસેથી મોટાપાયે વિસ્ફોટકો અને દારૂગોળો મળ્યા
શ્રીનગર,તા.૧૦
દક્ષિણ કાશ્મીરના કુલગામમાં સેનાએ રવિવારે એક મોટા ઓપરેશનમાં પાંચ આતંકીઓને ઠાર કર્યા છે. ૮ કલાકથી વધુ સમય સુધી ચાલેલી અથડામણમાં સેનાએ તમામ આતંકીઓનો ખાત્મો બોલાવી દીધો હતો. ઠાર કરાયેલા આતંકીઓ પાસેથી સુરક્ષાદળોને મોટાપ્રમાણમાં હથિયારો, દારૂગોળો અને અન્ય સામગ્રી મળી આવી હતી.
પ્રાપ્ત વિગતો મુજબ શનિવારે મોડીરાત્રે સેનાને કેલમ વિસ્તારમાં આતંકીઓની હાજરી અંગે માહિતી મળી હતી. આ માહિતીને આધારે સેનાની ૯ રાષ્ટ્રીય રાઇફલ્સ, જમ્મુ-કાશ્મીર પોલીસની એસઓજી અને કેન્દ્રીય રીઝર્વ પોલીસ દળના જવાનોએ કેલમ ગામની નાકાબંધી કરી હતી. જવાનોએ વિસ્તારમાં સર્ચ ઓપરેશન શરૂ કર્યું જેમાં બે ઘરમાં છુપાયેલા આતંકીઓએ સુરક્ષાજવાનો પર ફાયરિંગ કર્યું હતું. ત્યારબાદ વળતી કાર્યવાહીમાં સુરક્ષાદળોએ આતંકીઓ વિરુદ્ધ ઓપરેશન શરૂ કર્યું હતું.
સવારે પાંચ વાગ્યા આસપાસ શરૂ કરાયેલા આ ઓપરેશનને છ કલાક વિત્યા બાદ સેનાએ બન્ને ઘરોને ઉડાવી દીધા હતા. આ કાર્યવાહીમાં મકાનની અંદર છુપાયેલા ૫ આતંકીઓના મોત થયા હતા. સુરક્ષાદળોએ બાદમાં સર્ચ ઓપરેશન શરૂ કર્યું. સર્ચ દરમિયાન સેનાએ તમામ આતંકીઓની લાશ સાથે મોટાપાયે વિસ્ફોટકો અને દારૂગોળો મળ્યા હતા. સ્થાનિક સૂત્રોના મતે મૃતક આતંકીઓ પૈકી એક મોસ્ટ વોન્ટેડ કમાન્ડર પણ સામેલ છે. જા કે સેના તેમજ પોલીસે હજુ સુધી કોઈ સત્તાવાર માહિતી આપી નથી.
"વંદે માતરમ ,ભારત માતાકી જય"
